تبریز سسی : آشيق درويش يا " آشيق دوريش " آدي ايلئ تانينان رحمتلي درويش واهابزاده اورمو آشيق مکتبي نين ان مشهور آشيقلارينداندير. اورمو سبکي نين اوستاد آشيغي آشيق درويش تانينميش آشيق فرهاد'دان درس آلميشدير.
شکريازي هاواسي:
سالماس شهري نين کورسونني شکريازي کندينه منسوب اولان بير آشيق هاواسيدير. شکريازي کندي نين ده آشيق بهلول کيمي مشهور شاعير و آشيقلاري اولموشدور. ايراندا سونني تورکلرين چتين شعرلري آلتيندا ياشاديقلاري اوچون، شکريازيليلارين چوخو تورکييه يه و اؤزلليکله وان شهرينه کؤچموشدورلر.
اورمو آشيق مکتبي:
آزربايجانين اورمو، سولدوز، قوشاچاي، سالماس و خوي کيمي شهرلري و گئنل اولاراق گونئي آزربايجانين باتي بؤلگلرينه اؤزل اولان آشيق سبکينه اورمو آشيق مکتبي دئييلير. بو بؤلگلرده دانيشيلان تورکجه نين آزربايجان تورکجه سي و آنادولو تورکجه سي آراسيندا بير کؤرپو رولو اويناديغي کيمي، اورمو آشيق مکتبي ده آزربايجان، آنادولو و کرکوک آشيق مکتبلري نين بيرلشمسينده ن اورتايا چيخان بير مکتبدير. اورمو آشيق مکتبينده تورکمنيستان (گونئي و قوزئي) باخشيلاري نين ايزلري ده گؤرونمکده دير. اورمو مکتبي آشيقلاري نين ايفاسلاريندا گونئي آزربايجاني باشقا بؤلگلرينده کي و قوزئي آزربايجانداکي کيمي زيرنا و بالابان قوللانيلماماقدادير.
شيعه اولمايان آزربايجانليلار و هتتا خيريستييانلارين اورمو آشيق مکتبي نين گليشمه سي و اينکيشافيندا اؤنملي روللاري اولموشدور. اورمونين سونني تورکلرينده ن اولان دوللو موستافا و بالوولو ميسکين و سالماس خيريستييانلاريندان اولان قول هارتون بو مکتبي نين تمل داشيني قويان اوستاد شاعير و آشيقلارديرلار.
گونوموزده کورسونني طايفالاري و سونني تورکلردن اولان وردانلي آشيق مئناف و محبوب، گئجينلي آشيق صمد، قولونجولو آشيق زکريا و آشيق بخشعلي، علوي تورکلرده ن اولان گوژلر آشيقلاري، خيريستييان اولان آشيق يوسوف اوهانس و شيعه تورکلرينده ن اولان آشيق دهقان، آشيق بولود، آشيق ايسمعلي، آشيق عالي قارا آغاجلي و آشيق نابات عالي اورمو مکتبي نين تانينميش آشيقلاريديرلار. بونونلا اورمو آشيق مکتبي آزربايجاندا ياشايان چئشيدلي مذهبلر آراسيندا بير بيرليک رمزي و سيمگه سي کيمي ده ده يرلنديريلمکددير.
اورمو مکتبي نين آشيقلاري ان چوخ بالوولو ميسکين، دوللو موستافا، قول هارتون، خسته قاسيم، توفارقانلي آبباس، قولونجولو ده ده کاتيب، شکريازيلي آشيق بهول و پورازر کيمي شاعيرلرين شعرلريني اوخويارلار.
اورمو آشيق مکتبي نين هاوالاريندان:
اورمو گؤزلل مه سي - اورمو شرقيسي - اورمو قاراباغيسي - عوثمانلي شرقيسي - قوربتي - آراز باسدي -گؤيجه گؤزه للمه سي - تاجيري - بهمني - آوچي گرايليسي - همدان گرايليسي - سولدوزو - شکريازي - ديهداباني - کئسمه ديوان - هيجران - دول هيجراني - قارس - قئريني - گولشني - بندايي هيجراني - خاچا خالداري - جمشيدي - سيياستاپول - پاشام کؤچدو - موسلمان کئشيشوغلوسو - ائرمني کئشيشوغلوسو – تئره که مه گؤزه للئمه سي - سماهي - دوراخاني - نئسروللاهي - خوي امراهيسي -کسمه کرم - زارينجي - ميسري - تجنيس - جيغالي تجنيس - پناهي - گئرايلي - رئوزه گرايليسي - هربي - بهري ديوان و ... /
هیچ نظری موجود نیست:
ارسال یک نظر