هر اولوسون یاشامیندا معیشه تینده چوخلو بایراملار اولسادا، اونلاردان بیری داها آدلیم، داها سئویم لی اولور. آزربایجان تورک اولوسونون کئچیردیگی بئله بیر بایرام، ارگه نه قون دور(نوروز بایرامی).
گونه ش دونیانین گونئی یینین یاریم کوره سینده ن قوزئی یاریم کوره سینه کئچیدیگی واخت گئجه ایله گوندوز بیرله شیر. بو واخت قیش قورتاریر، یاز گه لیر. ائله ارگه نه گون بایرامی دا بو گونده کئچیریلیر. دئمه لی ارگه نه گون بایرامی یازین ایلک گونو، دوغانین جانلانماسی، توپراغین اویانماسی نین بایرامی دیر. اینسانلار ارگه نه گون بایرامی نین قارشینا چیخیرلار:
نوروز، نوروز باهارا،
گول له ر، گول له ر نوبارا،
باغچامیزدا گول اولسون،
گول اولسون بولبول اولسون ،
باهار گه لدی، باهار گه لدی، خوش گه لدی،
یورگون کونول اونو گورجه ک دیرگه لدی.
اکینچی اورون اکه جه گی توپراغین شومونا باشلاییر. باغبان مئیوه آغاجلارین قورو بوداغلارینی که سیب آتیر. اوشاقلار ارگه نه گون گولو، قارچیچه گی اوچون مئشه له ر، چولله ره اوز توتارلار.
ائل-اوبا، هه ر ائوده ارگه نه گون بایرامی نین گه لمه سینه آزی بیر آی قالمیش حاضیرلیق ایشله ری آپاریلیر. ائوله ر آغاردیلیر، پالتار-پالاز، قاب-قاجاق یویولور. حه یه ط-باجا سوپورولوب ته میزله نیر. هامی اوچون یئنی پالتار تیکیلمه گه جه د گوسته ریلیر.
ارگه نه گون بایرامی نین چه رشه نبه له رینده حه یه طله رده تونقال یاندیریلیر. تونقالین اوستونده ن هوپپانیب کوهنه ایلین آزار-بئزاری دا یاندیریلیر. اودون اوستونده ن هوپپانانلار بیر سیرا سوزله ر اوخونور:
آغیریلیغیم-اوغورلوغوم اودلاردا،
یازدا من له هوپپانمایان یادلاردا.
یاخود:
آغیر-اوغروم توکولسون،
اودا دوشوب کول اولسون،
یانسین آلوو ساچیلسین،
منیم به ختیم آچیلسین.
ارگه نه گون بایرامیندا قولاق فالینا چیخماق عه ن عه نه سی ده واردیر. قارانلیق دوشه نده توتوب قونشولارین دانیشیقلارینا قولاق آسماغا گئده ر له ر. ایلک ائشیدیله ن سوز توتولموش نی یه ته اویغون اولاراق یوزولور.
اودورکی، ارگه نه گون بایرامی آخشامیندا ائوله ر ده کونول آچان، اومود وئره ن دانیشیقلار دانیشیلمالی دیر. ارگه نه گون بایرامیندان ان چوخ یاییلمیش عه ن عه نه له رین بیری ده قورشاق ساللاماق دیر. داها چوخ اوشاقلار، جاوانلار قارانلیق دوشه نده ائوده ن ائوه گئدیب گه زیب باجادان، په نجه ره ده ن قورشاق ساللاییب بایرام پایی آلیرلار.
اونلارین قورشاقلارینا قوورقا، بویانمیش یومورتا، آلما، آرمود، اریک، قاوالی قوروسو، چئشیدلی شیرینی له ر باغلایرلار.
آزربایجان تورک له رینین بویوک قوشاری شه ری یار"حیدربابایا سلام" اثه رینده بو قورشاق ساللامادان دانیشیب:
بایرام ایدی گئجه قوضو اوخوردو،
آداخلی قیز بی جورابین توخوردو،
هه ر که س شالین بیر باجادان سوخوردو،
آی نه گوزه ل قایدادی شال ساللاماق،
به ی شالینا بایراملیغین باغلاماق!
شال ایسته دیم منده ائوده آغلادیم،
بیر شال آلیب تئز بئلیمه باغلادیم،
قولام گیله قاچیب شالی ساللادیم،
فاطما خالا منه جوراب باغلادی،
خان نه نه می یادا سالیب آغلادی!
ارگه نه گون بایرامی سوفراسینا چئشیدلی یئمه ک له ر، چه ره ز، شیرین له ر دوزه رله ر. سه مه نی گول چیچه ک، گوزگو، سو، قیزیل اشیالار قویورلار. ائوده کی له رین هه ر بیرینین آدینا شام یاندیریلیر!
ایناما گوره، ارگه نه گون بایرامی آخشامیندا هه ر که س گه ره ک ائوینده اولسون. بیر ده هامی ده رد-قمی اونودوب شه ن اووقتلی اولمالی دیر. اوندا بوتون ایل آدام اوچون ائله بویله کئچه ر.
ارگه نه گون بایرامینین گونونده هامی یئنی گئمیله ر گئیب بیر-بیرینین ائوینه بایرام گوروشونه گئده ر، آرماغانلار آپارارلار. بایراملاشماغا گه له ن له ر اوچون سوفرایا ارگه نه گون موناسیه ت ایله بیشیریلمیش شه که ر بورا، پاخلاوا، قوغال بیرده باشقا شیزنیله ر، دوزولور. ارگه نه گون بایرامیندا کودوره تله ر اونودولمالی دیر. هئچ که س گه ره ک بیر-بیری ایله کوسولو قالماسین.
ارگه نه گون بایرامی یاددا بوللوق، بیری-بییرنه سئومه ک، گوزه للیک بایرامی کیمی قالیر.
قایناق: سایان اویره نجی سئل درگی سی
اته ک یازیلار:
اورون= محصول
قوشار= شاعر
هیچ نظری موجود نیست:
ارسال یک نظر