آزه ربایجان چاغداش تاریخین آراشدیریب یاخود اوخویارکن پارلاق تاریخیمیزله یاناشی بیر چوخ اوزوجو و دهشتلی اولایلار و صحنه لرایله راست لاشیریق کی هر وجدانلی اینسانی کدرلندیریب، دوشوندورمه یه مجبور ائدیر. دئمک اولار باشی بلالی چاغداش آزه ربایجان، تورپاق و کولتور دوشمانلاری طرفیندن چوخلو چتین لیکلره معروض قالاراق، قارا، آجی و قانلی گونلر و آیلار گئچیریبدیر. بو آجی و قانلی اولایلاردان بیری ایسه ایراندا اسلامی انقلابدان سونرا آزه ربایجانین باتی بؤلگه سینده باش وئرن اولایلار و اؤزلیکله کوردلرین آشیری قروپلارینین سولدوزا اولان آخینی و اوردا اوز وئرن بیر هفته لیک ساواش دیر. 57 انقلابیندان همن سونرا کوردلر همیشه اولدوغو کیمی مرکزی اوتوریته نین گوجسوزلویو زامان عصیان ائدیب بؤلگه نی بیر ساواش آلانینا چئویردیلر. کوردلرین باشیندا ایسه "دموکرات" ، "کومله" آدلی پارتی لری دوروردولار. کوردلر "سویوق بولاق-ساووج بولاق" (مهاباد) اوردو ائوین تالایاندان سونرا دموکرات پارتی قالیبینده "عبدلرحمان قاسملو" باشچیلیغی ایله 20مین کیشیلیک اوردو قوروب آزه ربایجانین یوموشاق اشغالی آماجی ایله بیر حالدا کی سولدوزون یالنیزجا بئشدن - بیرینی کوردلر تشیل ائدیردیلر سولدوزدا بیر سیاسی میتینگ گئچیرمه یه حاضیرلانیرلار. سولدوزون میتینگ یئری سئچیلمه سینین ندنی ان اؤنملی مساله دیر. مثلا اونلار ندن تمامیله کوردلشن شهرلرده اؤرنک اوچون "سینان دز" (سنندج)، "ساققیز" (سقز)، مریوان، پاوه کیمی شهرلرده میتینگ گئچیرمیردیلر و "شهید چمران" دئمیشکن ((آزه ربایجانین قاپیسیندا)) بئله بیر مساله نی دوشونوردولر؟ اونلار انقلابدا یارانان مرکزی گوجون بوشلوقو یا گوجسوزلویوندن سواستفاده ائدرک نئچه اون ایللیک آرزولاری یعنی باغیمیسزلیقلارینی اودا اؤز توپراقلاری دئییل آزه ربایجان جوغرافیاسیندا قورماق ایسته ییردیلر. دئمک اولار بو قونو اونلارین چاغداش تاریخده ان اونملی استراتژیک یالنیشلیقلاری ساییلیر، چونکی "شیخ عبیدالله" ، "سیمیتقو" و حتی "قاضی محمد" دؤورلرینده بئله اونلار آزه ربایجاندا امنیتی پوزاراق تورکلری تالان ائدیب، یول کسیب، بنالاری سؤکوب داغیدیب و دهشتلی جنایتلره ال آتمیشدیلار. اما هرزامان آزه ربایجان خالقینین قهرمانلیغی قارشیسیندا دیز چؤکوب یئنیلمیشلردیر. افسوسلار اولسون کی اونلار هله ده تاریخدن درس آلمییب و گؤزلری آزه ربایجان تورپاقلاری آردیندادیر.
کوردلرین قاسملو باشچیلیغی ایله سولدوزا اولان آخینیندان بیر نئچه گون قاباق سولدوزون تورک قهرمان اهالیسی اونلارین اصیل نیت لرینی باشی دوشوب دموکرات پارتی یه مکتوب یازیرلار کی بو میتینگ لری سولدوزدا دئییل بلکه باشقا یئره گئچیریلسین. اما تاسف اولسون کی کوردلر توتدوغو یوللاریندا عینادلی ایدیلار و بو مکتوبو باشا دوشمورلر، حتی تورکلرین آغ ساققاللاری و قاراپاپاق ائلینین بویوک لری دموکرات لارین دفترلرینه گئدیب اونلاری بو ایشدن واز گئچمه یه چاغیریرلار اما بو ایشده فایداسیز قالیر و کوردلری داهادا حیرصلندیریب اونلارین آرتیق طاماحلیق خصلت لرینه شدت وئریر.
هرحالدا کوردلر 20مین نفرلیک چوخ مکانیزه بیر اوردو قالیبینده جوما گونو 31فروردین 1358 ده سولدوزا داخیل اولوب و سولدوزون اصلی خیاوانیندا رژه گئدیب و ایدمان سارایندا، فوتبال میدانیندا توپلانیرلار. بو حالدا بیر گولله سسیله تپه دن دیرناغا سلاحلی اولان کوردلر سولدوز خیاوانلاری و محله لرینه هجوم آپاریرلار و چوخلو سلاحسیز و گوناهسیز تورک لری و تورک عائیله لرینی اؤز ائولرینده بیر یئره سوی قیریمی ائدیب و ساواشی باشلاییرلار. او عائیله لردن کی سولدوزدا اؤز اوتوردوغو اوئلرینده عائله جه اؤلدورولوبلر "بدلی" و "قاسمزاده" عائله لرینه اشاره ائتمک اولار کی عائله کیچیک اوشاقلاری و قادینلاری ایله برابر قتل عام اولونموشدور. تورکلر بو خبرلری ائشیدیکدن سونرا اللرینده اولان چوخ آز سیلاحلا سولدوزون "قالا باشی"نی کی شهرین مرکزینده اولان تپه دیر اله گئچیریب و شهره مسلط اولورلار و قهرمانجاسینا چوخ ساییلی تپه دن دیرناغا مسلح اولان کوردلری گئری قاچمایا مجبور ائدیرلر. اما کوردلرین سیلاحلی اولدوغو اوچون و تورکلرده سیاح آزینلیغی ندنی ایله سولدوزدا بیر چوخ ایگیت و آدسیز میلی قهرمانلار شهید اولوب و قانلارین وطنلری اوغروندا فدا ائدیرلر. نهایت 3گون شجاعتلی دایانیشدان سونرا اورمو امام جوماسی "موللا حسنی"، بیر رادیویی پیام وئریر و انقلاب موجاهدلرینی اورمودان توپلاییب سولدوزا گلیرلر. اورمو موجاهیدلرینین گلمه سی کوردلری دارغین بیر دورومو سوخور و شهر ین یوزه 90فاییزی آزاد اولور و نهایت بیر هفته لیک ساواشدان سونرا کوردلر همیشه تاریخده اولدوغو کیمی قاچماغا باشلاییب و "خانا" (پیرانشهر)، "سویوق بولاق" (مهاباد)، "ساری داش" (سردشت) کیمی شهرلره قاچیرلار و سولدوز و داها دوغروسو آزه ربایجان بویوک بیر فتنه و تهله که دن قورتولموش اولور.
موللا حسنی اؤز خاطیرلرینده بازیر کی: ((ساواش بیتن گونو من ایکی ائوه باخماغا گئتدیم بیر ائوده 11نفرین باشین کسمیشدیلر کی اونو گؤردوکدن چوخ کدرلندیم. اؤرنک اوچون بیر 3یاشیندا قیز اوشاغینین باشین کسیب 3شیشله آناسینین باغرینا سوخموشدولار. قوجا کیشی و قوجا قادین اؤلن لرین ایچینده چوخ ساییدا گؤرسنیری. باشقا بیر ائوده 22نفری بیر یئرده اعدام ائتمیشلردی و بیر ائوده ده بیر گنج اوغلانی بالتاایله دوغرامیشدیلار. بو جنایت لرین عامیل لری او کسلردیلر کی "دموکرات" اولماق ادعالاری وارایدی.))
ساواش سولدوز اهالیسی و اورمونون انقلاب موجاهیدلری قهرمانلیغی ایله بیتیر اما کوردلرین بو کور سیاستی و آرتیق طاماحلیغی بؤلگه ده امنیتی آرادان قالدیریب و بیر چوخلو باشقا فاجعه لره یول آچیر. ایکینجی اؤنملی اولای سولدوزدا اوز وئریر. بؤلگه ده یارانان امنیت سیزبیگه گؤره سولدوزدا انقلاب موجاهید دسته لری قورولور و 18نفر ان ایگیت سولدوزلوللار "جلدیان" اوردو ائوین کی چوخ استراتژیک یئرده ایدی قوروماغا گئدیرلر. قاییداندا کورد کندی اولان "قارنا" دا کوردلرین پوسوسونا راست گلیب و بیریندن سونرا هامی سی شهید اولور، او بیر نفر (آدی قالسین) اؤزون شهره یئتیریب و اولایی بیلدیریر، شهرده ولوله یارانیر چونکی ساواشدان سونرا سولدوزدا یاشایان کوردلر ائورین ترک ائدیب قاچماغا مجبور اولموشدولار اما شهر آغ ساققاللاری منجه چوخ یالنیش بیر سیاست قالیبینده اونلاری بیرداها شهره و ائولرینه گئری قایتاریرلار، هله بوایشدن نئچه گون گئچمه دن کوردلر یئنه باشقا بیر فاجعه یاردیرلار، همده قارنا کندی دموکرات لارین مرکزی کیمی اولموشدو و اونلارین پایگاهی سایلیردی. بئله بیر دورومدا سولدوز انقلاب موجاهیدلری قارنا کندینه هجوم آپاریب و 17میلی شهید و ایگیدین انتقامین آلیب و کندی اودا چکیب و دموکرات لاری اولدوروب داغیدیرلار. تاسفلر اولسون کی بو قارنا مساله سی همیشه کوردلرین طرفیندن بیر اوزلو دئییلیب و همیشه تورکلرین او کندی اودا چکمه لری دئیلیر و بو مساله نین تمل داشلارینا هئچ اشاره اولونمور داها افسوسلر اولسون کی بیر سیرا تورک آزه ربایجانلی و حتی بیر سیرا سیاسی مدنی میلتچی آذربایجانلی لار بیلمه مه کدن دولایی بو حادثه نی کوردلر ایسته دیی کیمی باشا دوشورلر و یالنیش جاوابلارا چاتیرلار.
هرحالدا کوردلرین سیاسی رهبرلری چوخ سونرالار سولدوز اولان آخینلاری و ساواش باره سینده اؤز یالنیشلارینی قبول ائدیرلر، مثلا "عبدالله حسن زاده" دموکرات پارتینین رهبری "یاریم قرن ساواش" کیتابینین بیرینجی جلدینده یازیر کی: ((نقده فاجعه سینده پارتی نین رهبرلری چوخ بویوک سهو ائتمکله تهله که لی تله یه دوشدولر.))
بوگون سولدوزو آزه ربایجانین اویانیش، آزادلیق و دایانیش سیمگه سی آدلاندیرماق گئرچه یه اویغون بیر قونودور. اگر تبریز آزه ربایجان باش قالاسی دیر و اورمو تاریخی باش کندیمیزدیر سولدوز آزه ربایجانین آییق گؤزو، دویان قولاغی، آنلایان بئینی، گؤز ببه یی و قهرمانلیق دیاری دیر. بو گون هاممیمیز سولدوز ساواشی نین اؤنمی نی و اونون گله جکده اولان سیاسی رولونو باشا دوشمه لییق بلکه باتی آزه ربایجاندا اولان چیرکین سیاست لر که آزه ربایجانین و ایرانین بوتؤولویونو! هدفه آلیب اؤز منفعت لریمیز اوغروندا یؤنله ندیریک و دوشمانلاریمیز قارشیسیندا الی بوش قالماییب و تاریخی نقطه نی بیز قویمالییق.
رضا داغستانی - اورمو - 31فروردین1389
قایناق: http://chenlibel-sulduz.blogfa.com/post-52.aspx
۱ نظر:
سلاملار
چوخ سئوينديم عكسي گؤردوم
اللريز آغريماسين
ارسال یک نظر