اورمو گلینی

اورمو گلینی
دادسیز قالان دوزلو گلین
دورو ماوی گؤزلو گلین
/ورمونون آغ دون بالاسی
گؤز گؤز اولان جان یاراسی
آغ قانادی سینان ملک
یارپاق یارپاق سولان چیچک
بولودلاری سورگون اولان
ائل اوباسی اوزگون اولان
گور چایلاری آزدیریلان
قارا بختی یازدیریلان
ایرماقلاری دوستاق اولان
دالغالاری دوزلاق اولان
قودوز یادلار قورقوسوندا
تولکولرین  پوسقوسوندا
آغ خلعتی  بیچیلمه ده
سون بارداغی ایچیلمه ده
آهای......
آهای...
ماوی گؤز اورمو گلینی
اوزمه یوردوندان الینی
گؤز یاشیمیز سئل اولمادا
اورک قانی  گؤل اولمادا
قانالارین  قانین وئریر
بالالارین جانین وئریر
سن ائلیمین عزیزی سن
آزربایجان دنیزی سن
سریل آنا یاتاغیندا
جان اورمونون قوجاغیندا
دالغالارین نغمه دئسین
بول محصولون ائللر یئسین

آشیقلارین چالسین سازین
قوتلایاق قورتولوش یازین 

اسماعیل جمیلی      یاز     2010